tritiy adhyay
ishtanbhoganhi vo deva dasyante yajnabhavita:.
tairdattanapradayaibhyo yo bhunkte sten ev s:.. 12 ..
yajn ke dvara badhaye hue devata tum logoan ko bina maange hi ichchhit bhog nishchay hi dete raheange. is prakar un devataoan ke dvara diye hue bhogoan ko jo purush un ko bina diye svayan bhogata hai, vah chor hi hai ..12..
prashn- yajn ke dvara badhaye hue devata tum logoan ko ichchhit bhog nishchay hi dete raheange, is vaky ka kya abhipray hai?
uttar- isase yah bhav dikhalaya gaya hai ki tum logoan ko apane kartavy ka palan karate rahana chahiye, phir tum logoan se yajn ke dvara badhaye hue devata log tumako sada-sarvada sukh bhog aur jivan nirvah ke liye avashyak padarth dete raheange, isamean sandeh ki bat nahian hai; kyoanki ve log apana kartavyapalan karane ke liye badhy haian.
prashn- unake dvara diye hue bhogoan ko jo manushy unako bina diye hi bhogata hai, vah chor hi hai- is kathan ka kya bhav hai?
uttar- yahaan tak prajapati ke vachanoan ka anuvad kar ab bhagavanh uparyukt vaky se yah bhav dikhalate haian ki is prakar brahma ji ke upadeshanusar ve devata log srishti ke adikal se manushyoan ko sukh pahuanchane ke liye- unaki avashyakataoan ko poorn karane ke nimitt pashu, pakshi, aushadh, vriksh, trin adi ke sahit sabaki pushti kar rahe haian aur ann, jal, pushp, phal, dhatu adi manushyopayogi samast vastuean manushyoan ko de rahe haian; jo manushy un sab vastuoan ko un devataoan ka rrin chukaye bina- unaka nyayochit svatv unhean arpan kiye bina svayan apane kam mean lata hai, vah vaise hi kritaghn aur chor hota hai, jaise koee snehashil mata-pitadi se pala-posa hua putr unaki seva n karane se evan unake marane ke bad shraddh-tarpan adi n karane se, kisi ke dvara upakar paya hua manushy yatha sadhy pratyupakar n karane se athava koee dattak putr pita ke dvara prapt sampatti ka upabhog karake mata-pita ki seva n karane se kritaghn aur chor hota hai.
prashn- jabaki devata log manushyoan dvara santusht kiye jane par unako avashyak bhog pradan karate haian to phir unase paye hue bhogoan ko yadi manushy unhean vapas n bhi de to vah chor kaise hai?
uttar- srishti ke arambh kal se hi manushy yajn ke dvara devataoan ko badhate aye haian aur devata log manushyoan ko isht bhog pradan karate aye haian. yah parampara srishti ke arambh se hi chali ati hai. is paramparagat adan-pradan mean jin manushyoan ne pahale yajnadi ke dvara devataoan ko badhaya hai aur jo badha rahe haian, ve to chor nahian hai; parantu doosare manushyoan ke dvara badhaye hue devataoan se isht bhog prapt karake jo unake liye yajnadi nahian karata, usako chor batalana to uchit hi hai. jaise kisi doosare manushy ke dvara pusht ki huee gau ka doodh yadi koee doosara hi manushy yah kahakar pita hai ki gauoan ki seva manushy hi karate haian aur maian bhi manushy hooan to vah chor samajha jata hai- vaise hi doosare manushyoan ke dvara badhaye hue devataoan se bhog prapt karake unako bina diye bhogane vala manushy bhi chor mana jata hai.
|